கொலை வெறிப் பாடல்

" நமது கண்ணுக்குத் தெரியாமல் உலகின்
பல்வேறு மொழிகள் அழிந்து வருகிறது.
அதில் தமிழ் மொழியும் ஒன்று.
இன்னும் இருநூறு ஆண்டுகளில் தமிழ்
பேசுவோர் எண்ணிக்கை மிகவும் குறைந்து விடும்.
தமிழில் எழுதுபவர்களைப் பார்ப்பதே அரிதாக
இருக்கும் " என்கிறது மொழியியல் ஆராய்ச்சி
ஆய்வுகள்.


உலகின் பழமையான மொழி நமது தமிழ்மொழி.
அது அழிந்து விடுமா ? என்ற அச்சமும்,
சந்தேகமும் எழுந்தது.
அப்படி நடந்து விடக் கூடாது என்பதுதான்
என் எண்ணம்.


தாய் மொழிப் பற்றும், தனது மொழியைக்
காப்பாற்ற வேண்டும் என்ற எண்ணமும்
இல்லாத ஒரு தேசத்தில், எந்த மொழியும்
தானாகவே அழிந்து விடும்.
இந்த இக்கட்டு இப்போது நமது தமிழ்
மொழிக்கு ஏற்பட்டு உள்ளது.


நடிகர் தனுஷ் நடித்து, பாடி இருக்கும்
" ஒய் திஸ் கொலை வெறி " பாடல்
உலகம் முழுவதும் பரவி இருப்பதாகச்
சொல்கிறார்கள். அதாவது தமிழை
களங்கப்படுத்தி, கொலை செய்து உலகம்
முழுவதும் பரப்பி இருக்கிறார்கள்.
அந்தப் பாடலில் ஆங்கிலத்தை மிகவும்
அசிங்கமாகக் கலந்து, தமிழை உச்சக்கட்ட
அளவிற்கு கொலை செய்திருக்கிறார்கள்.


இந்தப் பாடலை வெட்கமே இல்லமால்
ஒவ்வொரு தமிழனும் ரசித்துக் கேட்கிறார்கள்

செல்போனில் ரிங் டோன் வைத்து கேட்கிறார்கள்.

நடிகர் தனுஷின் பிரபலத்தையும்,
புலமையையும் கேள்விப்பட்டு
நமது பிரதமர் டாக்டர் மன்மோகன் சிங்
விருந்து கொடுத்து, பாராட்டி இருக்கிறார்.
அப்படி என்ன ? சாதனை புரிந்துள்ளார்
என்று புரியவில்லை.


இந்த "கொலை வெறி பாடல் "
மிகப் பிரபலம் ஆனதற்காக திருப்பதிக்குப்
போய் மொட்டை அடித்து இருக்கிறார்
தனுஷ்.

பத்திரிகையாளர்களைச் சந்தித்து
" வரும் காலத்தில் இந்த மாதிரியான
நிறையப் பாடல்களைப் பாடப்போகிறேன் "
என்று வேறு சொல்லி இருக்கிறார்.


இவர் செய்யப் போகும் கலைச்சேவையை
நினைத்தால் உள்ளம் கலங்குகிறது.
தனிப்பட்ட முறையில் நடிகர் தனுஷின்மீது
எந்தவேத வெறுப்பும், கோபமும் யாருக்கும்
கிடையாது.


சினிமா மிகவும் சக்தி வாய்ந்த ஒரு ஊடகம்.
அதில், சமூக அக்கறை இல்லாமல் நடந்து
கொள்வதால்தான் உள்ளம் வேதனைப்
படுகிறது.


மூத்த கவிஞர்களான வாலி, வைரமுத்து
போன்றோர்கள் இந்த கொலை வெறி
பாடலைக் குறித்து பேசியதாகத் தகவல்
இல்லை. கவலைப் பட்டதாகத்
தெரியவில்லை.


ஒருவேளை, நடிகர் தனுஷ் , சூப்பர் ஸ்டார்
ரஜினிகாந்தின் மருமகன் என்பதால்கூட
இருக்கலாம் !


இந்த " கொலை வெறிப் பாடலை ஒட்டு மொத்த
தமிழகமும் புறக்கணிக்க வேண்டும்.
வலுவான எதிப்பினைத் தெரிவிக்க வேண்டும்.
அப்போதுதான், வருங்காலத்திலாவது
இம்மாதிரியான அருவருப்புப் பாடல்கள்
வருவதைத் தடுக்க முடியும்.


அந்தக் காலத்தில் அறநெறியுடன்,
தமிழை வளர்த்து இருக்கிறார்கள்.
இந்தக் காலத்தில், கொலை வெறியுடன்
தமிழை கொலை செய்து கொண்டு
இருக்கிறார்கள்.


"கொலை வெறியை" ஒரு சாதரணமான
ஒரு சொல்லாக்கி இருக்கிறார்கள்.
மக்களிடம் மறைமுகமாக, கொலை
வெறியைத் தூண்டி வருகிறார்கள்.

சாதாரண ஜெயமோகன்

தமிழ் இலக்கிய உலகில் ' ஜெயமோகன்'
பெயரைச் சொன்னதும் ஓர் அதிர்வு
ஏற்படுவதை பார்த்து வருகிறேன்.

ஜெயமோகனின் ஆழமான, நுட்பமான
எழுத்தின்மீது எனக்கும் ஒரு ஈர்ப்பு உண்டு.

'இவர் நோபெல் பரிசுக்குத் தகுதியானவர்'
என்று சொல்கிறது ஒரு கூட்டம்.

'இவர் மலையாளி. இந்துமத வெறியர்,
போலியான காந்தியவாதி ' என்கிறது
ஒரு கூட்டம்.

சமிபத்தில், ஒரு இலக்கியக் கூட்டத்தில்
பார்வையாளராக கலந்து கொண்டேன்.
நண்பர் ஒருவர், தனது நண்பர் ஒருவரை
எனக்கு அறிமுகம் செய்து வைத்தார்.

என்னை " ஜெயமோகன் " என்றார்.

அவரோ,"ஜெயமோகனா!." என்றார்
சத்தமாக !

அதிர்ச்சி, வெறுப்பு, கொஞ்சம் ஆத்திரம்
எல்லாமே தெரிந்தது அவரது கண்களில்.

உடனே நண்பர்,
"இவர் எஸ். எஸ் ஜெயமோகன்,
ஏற்றுமதி நிறுவனத்தில் பணியாற்றுகிறார்"
என்றார்.

அப்போது, அவர் என்னை சாதாரணமாகப்
பார்த்தார். நான் சொன்னேன்,
"நான் சாதாரண ஜெயமோகன்" என்று !

கிறிஸ்துமஸ் வரும் நேரம்

கிறிஸ்துமஸ் ஸ்டார்
------------------

அன்று பெதலகேமில்
உதிர்த்த நம்பிக்கை நட்சத்திரம்,
ஆண்டவர் பிறக்கப் போகிறார்
என்பதன் அருள் அடையலாம்.

நமக்காக ஒரு மெசியா பிறந்துள்ளார்
என்று மூன்று ராஜாக்களுக்கும் வழி காட்டிய
அந்த நட்சத்திரம், நம்
இல்லத்திலும் ஒளிவீசி
நமக்கு ஞானஒளி காட்டட்டும்.

கிறிஸ்துமஸ் மரம்
-----------------
பனி சூழ்ந்த இரவில், தன் வீட்டின்
மரத்தில் ஏரியும் மெழுகுவர்த்தியால்
அலங்கரித்து, கிறிஸ்துவின்
வருகை எவ்வளவு
பிரகாசமானது என்று
மார்டின் லூதர் தன் குடும்பத்திருக்கு
காட்டிய அருள் அடையாளம்தான்
கிறிஸ்துமஸ் மரம் என்பது வரலாறு.

மரம் என்பது உறுதிக்கும், வளர்ச்சிக்கும்,
பயனுக்குமான உதாரணம். இவைபோலவே
உறுதியாக நிலைத்திருப்போம்.
எல்லோருக்கும் பயனளிப்போம்.

கிறிஸ்துமஸ் தாத்தா
-------------------

குழந்தைகள் குதூகலத்துடன்
பார்த்து மகிழ்வது
கிறிஸ்து தாத்தாவைதான்.

கிறிஸ்துமஸ் இரவில் மாயமாய் வந்து
எல்லோருக்கும் பரிசுகளை அள்ளித்
தருபவர். எல்லோருக்கும் பிரியமானவர்.

நாம் பரிசு பெறுபவர்களாக
மட்டுமின்றி, பிறருக்கு பரிசுகளை
கொடுத்தும் மகிழ்வோம்.

++++

( 'அருள் நாதம்' இதழுக்காக நான் எழுதியது )

இதழாள்

இன்று, புதிதாய்
வாங்கி வந்த
வார இதழை
புரட்டிப் பார்க்கும்போது.....

முழுசாய் படித்து முடிக்காத
சென்றவார இதழ்
மௌனமாய்
முனங்குகிறாள் !

ஜனநாயக சிலுவை

அன்று,

பிலாத்து மன்னன்
தவறாக தீர்ப்பிட்டான்,
சிலுவை சுமந்தார் இயேசு !


இன்று,

ஆட்சியாளர்கள்
தவறாக திட்டமிடுகிறார்கள்,
விலைவாசி சிலுவையை
தினமும் சுமக்கிறோம் !

ஆத்ம தாகம்

எண்ணங்களையும், கதைகளையும் வார்த்தைகளால்
கோர்த்து அதை அச்சு வடிவில் பார்ப்பது என்பது
ஒரு வகை இன்பம்.

அதையே, கதாபாத்திரங்கள் ஏற்று நடித்து, பின்னர்
படமாக திரையில் பார்க்கும்போது கிடைப்பது பேரின்பம்.

அந்த இனிய அனுபவம் எனக்குக் கிடைத்தது.

"ஆத்ம தாகம்"- குறும்படத்தின் கதைச் சுருக்கம் இதுதான்.


கல்லறைத் திருநாள். கல்லறைத் தோட்டம், அதில்,
சூசை, தாமஸ் ஆகிய இரண்டு கல்லறைகள்.

தாமசின் கல்லறைகள் மாலையிட்டு, மலர்தூவி,
மெழுகுவர்த்தி ஏற்றப்பட்டு இருக்கிறது. சூசையின்
கல்லறை கட்டான் தரையாக இருக்கிறது.
யாரும் வரவில்லை. பராமரிக்கப் படவில்லை.

இரண்டு ஆத்மாக்கள் ஆத்மார்த்தமாக பேசிக்
கொள்கிறார்கள். அழுகை, புலம்பல், ஏக்கம்
அத்தனையையும் பகிர்ந்து கொள்கிறார்கள்.

பாதிரியார் ஜெபம் செய்து, கல்லறை மந்திரிப்பு
செய்கிறார்.தீர்த்தம் தெளிக்கிறார். சூசை, தாமஸ்
கல்லறைகள் மீதும் விழுகிறது. ஆத்மாக்கள்
குளிர்விக்கபடுகிறது.

பதினைந்து நிமிட குறும்படம். நினைத்ததைவிட
அற்புதமாக வந்திருந்தது.

சாந்தோம் தேவாலயத்தில் நவம்பர் இரண்டாம் தேதி
ஆத்மாக்கள் நினைவு நாள் அன்று, பேராயர் சின்னப்பா
அவர்கள் வெளிட்டார். அன்று எல்லோருக்கும் படம்
காட்டப்பட்டது.

பார்த்தவர்கள் எல்லோரும் பாராட்டினார்கள்.
நண்பர்கள் வாழ்த்துக் கூறினார்கள்.
கத்தோலிக்கத் திருச்சபையின் மதிப்பீடுகளை
அழகாகச் சொல்லி உள்ளீர்கள் என்றார்கள்.

படத்தில், சூசை, தாமஸ் ஆகிய இருவரின் ஆத்மாக்களின்
தாகம் தணிந்தது.

நிஜத்தில், இந்தக் குறும் படத்தை உருவாக்கிய எங்களது
ஆன்ம தாகமும் தணிந்தது.

என்மீது நம்பிக்கை கொண்டு, இந்தப் படத்தை தயாரித்த
பாசமிகு அருட்தந்தை பீட்டர் ஜெரால்ட் அவர்களுக்கு
எனது நெஞ்சார்ந்த நன்றிகள்.

முகநூல்

FACE BOOK
---------

நண்பர்களுடன்,
நண்பர்களின் நண்பர்களுடன்
கணினி வழியாக
கைக்குலுக்கி மகிழலாம் !

அதே நேரத்தில்,

முகம் பார்க்க வருபவர்களை
மூழ்கடிக்கச் செய்யும்
அழகான
ஆழ்கடல் !