ஈழம் வெல்லும்

இலங்கை வானொலியின்
தமிழ் நிகழ்ச்சிகளை
காதருகில் வைத்து
கேட்டதொரு காலம்...

இப்போது …
வந்து விழும் செய்திகளால்
காதே வெந்து போகும்..

துயரத்தின் மொத்த உருவமே
உனது பெயர்தான் ஈழமா !
இத்தனை பலிகள் வாங்கியும்
இன்னும் உனக்கு உயிர்த் தாகமா ?

மாண்ட வீரர்களின் மரணம்கூட
இங்கே அரசியலாகிறது...
காசுக்கு விற்பனையாகிறது !

சமாதியில் சாம்ராஜியம் - அங்கே
அரக்கர்களே அரசர்கள் !

எரிக்கப்பட்ட சாம்பலிலிருந்து
உயிர் பெற்று எழும்
பினிக்ஸ் பறவையாய்..
ஈழ இளையவர்கள் நாளை
அகிலத்தை ஆள வேண்டும் !

கொப்பளிக்கும் தமிழ்நதிகள்
குளிர வேண்டும்,
இவற்றை எல்லாம் - நம்
ஆயுள் முடியும் முன்பே
கண்டுவிட வேண்டும் !